SIBU: Perintah Besai ke baru dikearapka terus mai pemansang ke Sarawak lebih agi besenutuk enggau peminta rayat di nengeri tu.
Kaban Kunsil Nengeri (ADUN) Tamin Christopher Gira Sambang madahka, kerejasama ti manah entara perintah nengeri enggau perintah besai chukup beguna dikena nentuka Sarawak terus mansang setanding nengeri bukai di Malaysia.
“Tuai menua kelia setuju numbuhka Malaysia bepelasarka sekeda penetap enggau pengelebih ti mai tuju ngemansangka Sarawak nuju tikas ke lebih manah tebal agi pemansang sosioekonomi.
“Sebedau sempekat disain ba pengawa numbuhka Perintah Malaysia, Sarawak udah mantaika 18 pekara ti deka dipasukka ba untuk dimasukkan dalam Sempekat Malaysia 1963 (MA63) seraya Sabah mantaika 20 pekara,” ku iya madah nengah siti video ti dikunsika iya ba Facebook beserimbai enggau pengerami Hari Malaysia maya hari Empat.
Beduduk ari nya, Gira madahka enti sema bisi sebarang ubah deka dipejalaika mesti bemalinka MA63.
“Mayuh macham pemansang perengkaguna ke udah dibai perintah besai ke Sarawak baka ngaga jalai alun, sekula, hospital, klinik pengerai sekalika ba mengeri tauka ba menua pesisir.
“Tu nyengkaum bekal ai enggau bekal karan di mengeri tauka menua pesisir,’ ku iya madah agi.
Kelimpah ari nya, mayuh projek pemansang bukai ke udah tembu digaga, benung digaga sereta diperambu perintah besai enggau perintah nengeri dikena ngelantangka pengidup rayat di nengeri tu.
Perintah Sarawak ti dituaika Kepala Menteri Datuk Patinggi Abang Johari Tun Openg terus mekuhka pemansang infrastrakcha di serata Sarawak seraya deka nyapai juluk nyadi entara nengeri pemadu maju di Malaysia manggai taun 2030.
