SRI AMAN, 16 Sept: Komiti Mutarka Isu Dadah enggau Substance (MIDS) deka ditumbuhka ba tetiap bidang kuasa Penghulu ari semua bansa baka Melayu, Iban enggau Cina sitak DUN Simanggang.
Menteri Muda Pengelantang Komuniti, Datuk Francis Harden Hollis madah, penumbuh tu siti pelasar dikena nempa kerejasama komuniti dalam nagang kes salah guna dadah.
“Kaban komiti MIDS ulih ngatur aktiviti lurus agi sereta mekuhka pengawa ngatur ti lebih sistematik.
“Dikearap nengah penumbuh Komiti MIDS ba tetiap bidang kuasa Penghulu ulih nyungkak pemereti ati komuniti nengah aktiviti empas salah guna dadah,”ku iya ba sesi licha Program Randau Pengelantang Komuniti nengah aplikasyen zoom,di Bilik Aum Opis Pelilih Sri Aman, empai lama.
Program Randau Pengelantang Komuniti diatur Opis Kaunsil Pemansang Rama (MPS) Opis Menteri Pengintu Pengelantang Pendiau, Komuniti, Orang Indu enggau Pemansang Nembiak Mit (KWKPK)
Harden ke mega Sapit Chairman Komiti OSC MIDS renggat nengeri madah, ba program nya berandauka tuju penumbuh enggau tanggungpengawa komiti MIDS ba renggat bidang kuasa Penghulu.
Entara tuai bansa ke bisi datai maya sesi randau iya nya Penghulu Hj Abdul Samad bin Hj Abďul Rahim, bidang kuasa Kpg Hulu/Kpg Muhibbah, Penghulu Tiong Chong Onn, bidang kuasa Bandar Simanggang, Penghulu Kang Tai Kong, bidang kuasa luar mengeri Simanggang.
Sama bisi datai mega, Penghulu Mingging Sigan, bidang kuasa ari Ulu Undop, Penghulu Bailey Gamang, bidang kuasa Sengat ti diarika Empaga Bailey sereta sekretari dalam carta organisasyen Komiti MIDS ba tetiap endur Penghulu di N32 Simanggang.
