KUCHING: Berindik ari kluster endur gawa entara kluster ke ngerikodka mayuh kes COVID-19, Penyanding Penemu Komiti Mutarka Penusah Ngenyit Nengeri (JPBN) Sarawak Datuk Seri Dr Sim Kui Hian udah ngeluarka garis lalau tauka Standard Atur Pengawa (SOP) dikena nagang pengekai COVID-19.
Iya madahka, pekara ti keterubah mesti dikemeratka pengaji iya nya nentuka tetiap iku pekereja sida udah nerima dua dos vaksin dikena nyaga diri ari dirampit COVID-19.
Kedua, pengaji mesti nentuka pekereja sida madahka status tauka gaya pengerai sida ninting hari nyengkaum sida ke kemisi tauka enda nurun gawa.
“Entara pekara bukai iya nya meresa pekereja ke enda gerai engka bisi kena rampit COVID-19, enda ngira sakit nya balat tauka enda, enda ngemendarka pekereja nurun gawa lebuh nganti peresa chulit, meri sida kemisi bebayar tauka gawa ari umah, minta pekereja mesti nguna ‘face shields’ kelimpah ari nguna sengkabung mua.
“Kelimpah ari nya, nentuka pejalai angin ba endur gawa seruran manah, lebih agi ba dapur enggau kantin, nentuka pekereja nyaga seraka fizikal lebuh ba endur gawa tauka buding, atur maya makai ba dapur, makai tengah hari enggau ngirup lemai diteritka agi, “ ku iya madah nengah siti penerang ti dikunsika iya ba facebook maya hari Empat.
Dr Sim mega madahka, anang masang aircon kerita kompeni lebuh pekereja mindah beraban lebih ari dua iku tauka muka cheremin kerita, minta pekereja gawa beraban nitihka chara ke selamat, seruran minta pekerja meresa pengerai diri nguna kit peresa jampat sereta ngasika SOP ke udah ditetapka JPBNS ba endur gawa.
Kelimpah ari nya, Dr Sim ke mega Menteri Kaunsil Kandang Menua enggau Pengawa Berumah madahka, tetiap iku pekereja ulih nyeliahka diri mai pulai virus COVID-19 nengah chara ngasika SOP ba endur gawa iya nya anang nurun kereja enti ngasaika diri sakit.
“Pekereja mega mesti terus madah ngagai pengaji sida enti sema bisi kontak kes COVID-19 tauka bisi sida sebilik sakit,’ ku iya madah agi.
