KUCHING, 16 Sept: Orang ti udah nembuka dua dos tuchuk vaksin Covid-19 enda ibuh agi kuarantin tama ke Sarawak diteritka berengkah sehari tu.
Komiti Mutarka Penusah Ngenyit Nengeri (JPBN) Sarawak mutuska pekara nya pengudah ngambi kira gaya kes Covid-19 di Sarawak enggau nengeri bukai.
Berebak enggau nya, perintah Sarawak ngambi pemutus bagi orang ti udah nembuka dua dos vaksin tama ke nengeri tu enda ibuh agi kuarantin pengudah ngambi kira pemayuh orang udah divaksin di serata menua.
Taja pia, JPBN nyemetak madah, sida ti deka pulai tauka tama ke Sarawak mesti ngisi EnterSarawak enggau eHealth Declaration Form (eHDF) .
Tu nyengkaum mantaika sekali status dokumen ‘udah nembuka dua dos vaksin’, pemutus RT-PCR Negatif (semina ulih tiga hari) enggau data diri ke bukai.
Ku JPBN nambah, nembiak ke baruh umur 18 taun ti tama ke Sarawak begulai enggau penyaga sida ti udah nembuka dua dos vaksin dikemendar enda kuarantin tang dipinta bejalaika kuarantin di rumah pengelama sepuluh hari.
