LANGKAWI: Sesiku orang ti deka nemuai ke Langkawi mesti bejalaika peresa chulit COVID-19 sebedau ke pulau nya berengkah pagila.
Ku Menteri Dagang Temuai, Seni enggau Main Asal Datuk Seri Nancy Shukri madah, pemutus tu siti inisiatif ke positif taja pan dipadah laun mimit sereta mai penyaru ngagai mensia mayuh.
Pemutus tu mega digaga sepengudah perintah beratika risiko penambah kes COVID-19 ba pulau nya berindik ari projek rintis gelembung dagang temuai tauka “Travel Bubble” .
“Sebedau tu aku madahka, enda ibuh swab test (peresa chulit COVID-19), tang sepengudah nya Opis Menteri Pengerai madahka bisi swab test, tang Opis Menteri Pengerai enggau Opis Kaunsil Menua nangika kes majak nambah.
“Berindik ari nya, raban ari MOTAC (Opis Menteri Dagang Temuai, Seni enggau Main Asal) nyambut manah pemutus nya,” ku iya madah ba aum media sepengudah ngulu pengerami ngelancharka muka baru Langkawi nyadi palan ngelantangka ati maya malam hari Tiga.
Program nya dipejadika Menteri Besai Kedah Muhammad Sanusi Md Nor.
Taja pan pekara tu dipadahka laun sereta meri penyaru ngagai rayat , tang tu sebagi ari inisiatif dikena kitai nagang pengekai igi penyakit COVID-19.
Sebedau tu, Menteri Pengerai Khairy Jamaluddin madahka, tetiap iku temuai ke Langkawi mesti bejalaika peresa chulit berengkah pagila.
Peresa Chulit tu mesti dipejalaika semua orang ti berumur 18 taun ke atas enggau nembiak ti berumur 7 nyentuk ke 17 taun.
Nangkanka nya, Nancy nerangka projek rintis gelembung dagang temuai Langkawi tu deka nyadi taka dikena nentuka sekalika patut endur bukai dibuka nyadi palan penemuai.
“Enti projek tu mujur, projek gelembung tu deka ngemudahka perambu kitai. Semua benung nganti pemutus ari Langkawi. Udah nya baru palan dagang temuai ke bukai dibuka, “ ku iya madah agi.
