SRI AMAN, 16 Sept: Bisi 2010 iku nembiak sekula ke beumur 16 enggau 17 taun di sitak pelilih Sri Aman udah betuchuk vaksin ari 8 nyentuk 11 September 2021.
Kaban Kunsil Nengeri (ADUN) Simanggang, Datuk Francis Harden Hollis madah, ari penyampau nya 524 iku nembiak udah nerima vaksin dos keterubah ba Palan Meri Vaksin (PPV) Dewan Suarah Sri Aman.
“Nembiak tu reta berega ke megai pengawa perintah enggau ngemansangka nengeri Sarawak dudi hari ila.
“Nyadi modal mensia mesti ngembuan pengerai ti manah ari semua sukut sekalika jalai pengarap enggau fizikal,’’ ku iya dalam siti penerang.
Harden ke mega Menteri Muda Pengelantang Komuniti madah, nembiak ke betuchuk vaksin tu iya nya raban nembiak sekula di pelilih Sri Aman.
Dulu agi ari tu, Kepala Menteri Datuk Patinggi Abang Johari Tun Openg bisi matau proses betuchuk vaksin nembiak 16 enggau 17 taun di PPV Dewan Suarah Sri Aman kelai pengerai sida patut dijaga..
Ba awak ke sama, Abang Johari mega bisi ngelawa projek ‘Benak Tower’ enggau Pangkalan Ikan Bulu di Simanggang.
