BETONG, 16 Sept: Bisi 18 kompaun dikeluarka beungkus RM124,200 dikeluarka asil bejalaika pengawa meresa ngagai 41 premis di pelilih Betong, Pusa enggau Saratok.
Dalam siti penerang madahka, ari penyampau nya RM200 kompaun dikeluarka Opis Menteri Dagang Dalam Menua enggau Pekara Bebelika Barang (KPDNHEP) ketegal enda nitihka atur meri chap ba barang ke dijual.
“Kompaun dikeluarka ketegal ngelanggar Standard Atur Pengawa (SOP) nengah operasyen besepadu ngagai premis.” ku penerang nya.
Operasyen besepadu ti dipejalai pengelama dua hari berengkah 15 nyentuk 16 September nya mungkur 55 iku raban ari empat ejensi perintah iya nya Opis Pengerai Bagi Menua Betong , Opis Pengerai Pelilih Saratok, Polis Diraja Malaysia, Opis Menteri Dagang Dalam Menua enggau Pekara Bebelika Barang (KPDNHEP) sereta Opis Kaunsil Mengeri Saratok.
Entara penyalah SOP ti digaga pengempu premis iya nya enda nyendiaka jalai tama enggau pansut dalam premis enggau takah 1 meter, enda natak penyampau mensia mayuh tama ke dalam premis enggau pemegai lisin sereta pengempu premis enda nyendiaka penuchi jari.
