SELANGAU 15 SEPT: Projek Ngaga Jematan Rumah Senabong berengkah dipejalaika sehari tu.
Kunteriktor dipadu ngaga projek nya dikearap ulih ngerumban projek ungkup pengelantang peranak dia.
Kaban Kunsil Nengeri (ADUN) Tamin YB Ir. Christopher Gira Sambang madahka projek ngaga jematan Rumah Senabong ba kilometer 68, sitak Tamin digaga ngambi ngemanahka jematan nya ke kala runtuh.
Nangkan ke nya ku iya projek tu laun mimit berengkah digaga berindik ari pandemik Covid-19.
“ Nyadi projek tu udah ditinda lebih kurang bulan 8 suba, nyadi projek tu laun berengkah ketegal kitai ke napi pandemik Covid-19, enda ulih gawa maya MCO. Nyadi diatu kunteriktor udah berengkah ngaga jematan tu.
“Aku mega ngarapka kunteriktor tu ulih jampat nembuka projek ngaga jematan tu”, ku iya.
“ Ungkup bagi ngatur projek tu iya nya ari “Projek Sistem Maklumat Rekod Jalan Raya Malaysia (MARIS) ba baruh atur SEDC”, ku iya lebuh dikerandau pemberita TVS.
Gira mega madahka enggau pemisi tauka penembu jematan tu ila ulih meri pengelantang ngagai rayat ketebal agi pengani ti diau ba genturung pendiau nya.
