KUALA LUMPUR: Perintah Besai enggau Pakatan Harapan (PH) udah nyain sempekat Pemereti Ati (MoU) transformasyen enggau pengenap politik iya nya keterubah kala digaga di menua tu.
Tuju tu dikena negapka kerejasama entara Dwi-Partisan sereta ngemanahka agi kaul parti politik di menua tu.
Perkara tu seririh enggau lalau Yang di-Pertuan Agong, Al Sultan Abdullah Ri’ Ayatuddin Al Mustafa Billah Shah beserimbai enggau aum keterubah penggal keempat Parlimen ke-14.
Ku Menteri Besai, Datuk Seri Ismail Sabri Yaakob, MoU tu nyengkaum sukut ngemanahka agi Pelin COVID-19, Transformasyen Pengatur Menua, Ngemaruka Parlimen, Pengelantang Institusyen Akim, Sempekat Malaysia MA63 sereta Numbuhka Komiti PEMANDU.
Ku iya madah agi, MoU tu sebagi ari sejarah ketegal tu keterubah digaga di menua tu.
“Transformasyen ti digaga perintah tu ukai semina nyadika pengawa ngatur menua enggau manah agi tebal agi dalam sukut ngemunaska igi penyakit COVID-19 sereta mulaika baru pemanah ekonomi, tang mega nyadi siti pekara ke ulih narit pemeranak puku sereta ngangkat manah tikas ekonomi menua ungkup pengelantang Keluarga Malaysia.
Perintah mega pechaya memorandum pemereti ati tu ulih nyeliahka charut entara politik, lalu ulih nentuka menua pulai manah baru enggau lanchar sereta inklusif.
