KUCHING: Sarawak ngerikodka 9 kes pemati maya hari dua ti ngaul orang ke berumur entara 51 taun nyentuk ke 89 taun.
Ku Komiti Mutarka Penusah Ngenyit Nengeri Sarawak (JPBNS) madahka, mayuh entara ke bebadi nyawa tu ngaul orang ke bisi penanggul pengerai baka penyakit darah tinggi, sakit buah pinggang sereta kemi manis.
Ku JPBNS, penambah kes pemati tu ngujungka penyampau semua kes pemati nambah ngagai 639 iti kes naka ke diatu.
Kelimpah ari nya, bisi empat kluster baru ditukuka iya nya Kluster Laman Bong Chin, Kuching, Kluster Jalan Upland, Kuching,Kluster Kampung Segedup, Kuching enggau Kluster Jundak Saeh Merah, Subis.
Dua ari kluster tu ngaul kluster institusyen iya nya palan nyaga anak mit enggau palan nyaga orang lunggar umur lalu dua agi kluster ngaul kluster komunti.
Dua kluster udah diketuka iya nya Kluster Jalai DBKU Di Kuching enggau Kluster Jalai Tenaga Kuching sepengudah nadai ngerikodka kes dalam timpuh 28 hari.
Penyampau kluster ke agi aktif iya nya 139 kluster.
Nangkan ke nya, Sarawak ngerikodka 1,983 iti kes baru COVID-19 ti ngujungka penyampau semua kes iya 162, 303 kes naka hari dua.
99.7 peratus ari kes tu ngaul kategori 1 enggau 2 lalu 0.3 peratus ngaul katergori 3, 4 enggau 5.
Bisi 2,514 kes udah gerai naka hari dua lalu penyampau semua ke udah gerai enggau dikemendarka pansut sri sepital manggai 120, 719 iti kes.
