MIRI, Sept 13 : Servis veteran raban soldadu agi ulih dikena kelebih agi ba dalam komuniti kitai.
Ku Datuk Mengeri Miri Adam Yii Siew Sang, pemanah tanggungpengawa sida meruan dikeingat mensia mayuh kelebih agi dalam mantu perintah nengeri nagang pengekai igi penyakit COVID-19.
“Aku deka madahka pemanah tanggungpengawa veteran raban soldadu ngagai menua kitai iya nya Malaysia enggau nengeri kitai Sarawak meruan dikeingat mensia mayuh lalu servis sida agi beguna ba dalam komuniti,”
“Ambika chunto, veteran raban soldadu tu mega mayuh tetemuka tambai burak ba sekeda endur di pelilih Miri,”
“Ba maya nya, mensia mayuh ngibauka tambai burak laban ti endang amai begunaka bantu,” ku iya madah ngagai pengarang berita UKAS lebuh meri bantu kereban pengelikun ngagai Gerempung Veteran Raban Soldadu Malaysia.
Iya madahka, perintah ukai semina seruran meratika nasit raban ti udah pinchin tang tetap meruan ingat ngagai pemanah sida ngagai bansa enggau menua.
Ku iya, pengeransing pengawa raban soldadu ti udah besabung nyawa meruan dikeingat laban enti nadai ketegal soldadu, menua tu nyangka enda ulih maju enggau mansang baka diatu.
Pia mega, iya madahka, perintah beratika pengelantang pendiau raban soldadu ti udah pinchin ngambika sida ulih ngasaika pengidup ti meruan enggau lantang.
