LIMBANG, Sept 13 : Sepenyampau 1,515 iku ti nyengkaum 80 iku nembiak ari luar pelilih Limbang ke beumur 16 enggau 17 taun udah divaksin dos keterubah ba Balai Suarah Sri Limbang.
Program betuchuk vaksin nya udah diatur sepengelama tiga hari ti berengkah ari10 nyentuk ke 12 hari bulan Semilan 2021.
Ku Menteri Muda Betanam Betupi Moden, Tanah Adat Enggau Pemansang Kandang Menua Sarawak Datuk Dr Abdul Rahman Ismail madah, nembiak tu udah divaksin enggau pemendar ari bala apai indai sida iya.
Ku iya nambah agi, di pelilih Limbang bisi lima buah sekula sekondari ti ngembuan sepenyampau 1,435 iku nembiak.
Pia mega bisi 80 iku nembiak ari luar Limbang udah ngerijista enggau nerima tuchuk vaksin.
“Di pelilih Limbang bisi lima buah sekula sekondari enggau penyampau nembiak ke udah dikemendarka nerima tuchuk vaksin iya nya 1,435 iku,”
“Pia mega bisi 80 iku nembiak ari luar Limbang udah ngerijista enggau nerima tuchuk vaksin,”
“Sepengelama tiga hari tu, bisi 1,515 iku nembiak udah divaksin,” Abdul Rahman bejaku munyi nya pengudah ngabas palan meri vaksin di Balai Suarah Sri Limbang maya hari Enam.
Iya nyemetak madah enti sema bisi nembiak tauka ke beumur 18 taun ke atas bedau divaksin ulih datai ngagai palan betuchuk vaksin (ppv) Balai Suarah Limbang laban chara ‘walk in’ bisi disediaka.
Datuk Dr Abdul Rahman ke mega Kaban Kunsil Nengeri (ADUN) Bukit Kota madahka pelilih Limbang udah ngerikodka sepenyampau 30,987 tauka 91.5 peratus dos keterubah enggau 30,510 tauka 90.1 dos kedua kena hari Enam.
