KUCHING, 12 Sept: Ukai semina pelasar ngansah pengelandik ti dikembuan anak Sarawak, program ‘Sarawak Got Talent 2021’ ti diatur chara hibrid nyata ngangkatka karya seni lebih tinggi ti ulih dikomersialka.
Menteri Dagang Temuai, Seni enggau Main Asal, Dato’ Sri Hajah Nancy Shukri madah, program tu diatur Opis Seni enggau Budaya Malaysia Nengeri Sarawak (JKKN) nengah kerejasama Opis Servis Rayat Sitak Parlimen Batang Sadong beserimbai Hari Malaysia .
“Penyelai tu nyadi elemen ke pemadu beguna enggau pematak ngagai dagang temuai di dalam enggau menua luar ngelala Malaysia semak agi.
“Nengah ‘Sarawak Got Talent’, pemanah mayuh macham seni enggau budaya enggau ekstetika ke bisi ba tiap-tiap etnik di Sarawak ulih dipandangka ngagai mensia mayuh,” ku iya dalam laman facebook iya kena Hari Enam.
Nancy ke mega Kaban Parlimen Batang Sadong madah, taja menua agi betapi enggau pandemik Covid-19, tang nya ukai penanggul neruska aktiviti seni budaya kelimpah meri peluang seni dikelala nengah pelasar media maya.
Ku iya madah, program tu udah dipejalai berengkah 15 Julai 2021 nyentuk 15 September ti mungkur 87 iku pesereta di serata Sarawak.
Elemen nyengulaika penteba budaya ti ngembuan pupu bansa tu ulih dijadika karya seni dalam semua chara dikena ngangkatka pesaka asal bansa.
“Tu deka ulih dijadika buah penemu enggau isi dalam video pesereta. Isi nya ulih diinovasyen nyadi siti buah runding ke baru dalam dunya kreatif ti tau dipandangka,” ku iya.
Nancy nambah, kreativiti pengelandik anak Sarawak deka ngangkatka seni budaya deka nyadi inspirasyen enggau buah runding karya kreatif kontemporari.
Nya alai, Opis Menteri Dagang Temuai enggau Main Asal nengah JKKN seruran mekuhka mandang identiti seni nengeri Sarawak nitihka gaya arus pemansang.
