SIBU: Sesiku orang ke ngembuan penanggul pengerai ulih dirampit sekeda penyakit ba baruh kategori 3 nyentuk ke 5.
Pekara nya dipadahka Koordinator Komiti Mutarka Penusah Ngenyit Bagi Menua (JPBB) Sibu, Dr Annuar Rapaee.
Iya madahka tu nyengkaum sida ke sakit tungkul ati, tinggi darah, kemi manis, penanggul lempuang, ampus, riman, penyakit tungkul sengayuh, orang ke nginsap, enggau orang tuai ke beumur 60 ke atas.
Beduduk ari nya, mensia mayuh dilalau ngambika seruran nyaga sereta meresa tikas pengerai diri.
“Aku ngelalau semua mayuh chara dikena nyeliahka kategori 3 enggau 5 tu. Kelimpah ari betuchuk vaksin udah ngurangka kes kategori 3 nyentuk ke 5 tang semua pekara ke tau nyadi penusah nya tadi mesti deka diperatika.
“Umur sigi enda ulih diubah. Tang, nginsap ulih diubah. Pekara ke ulih dijaga baka obesiti, kemi manis, tinggi darah, semua pekara nya ulih dijaga,” ku iya madah lebuh nerangka senentang pengerembai COVID-19 ba laman facebook maya hari Enam.
Dr Annuar mega ngelalau orang ke beumur lebih ari 30 taun ke atas seruran meresa tikas darah diri.
“Aku deka madahka COVID-19 tu meri peluang ngagai kitai nyaga pengerai kitai. Kelimpah ari nyaga diri ari dirampit igi penyakit COVID-19. Pengerai kitai mesti dikemeratka lalu kitai mesti ngurangka semua pekara ke tau mai penusah nya tadi,” ku iya madah agi.
Iya ke mega Kaban Kunsil Nangka madahka, naka ke diatu nembiak ke beumur 16 enggau 17 taun ba Sibu nyambut manah program betuchuk vaksin ke diatu benung diatur ba serata nengeri nguna chara berenggat.
Penyampau nembiak ke nulak ari dituchuk vaksin mimit enti dibanding sida udah divaksin.
“Semina 3.3 peratus tauka 57 iku aka nembiak ke nulak ari betuchuk vaksin ba hari ti keterubah ti dibanding 83 peratus tauka 1, 427 iku nembiak ke udah nerima vaksin di Sibu,” ku iya madah.
