KUCHING, Sept 12 : Ku direktor Opis Pengerai Nengeri Sarawak (JKNS) Datuk Dr Mohamed Sapian Mohamed madah, kes positif COVID-19 majak nambah di Sarawak ketegal nyidi kontak semak kelebih agi ba kluster mengkang aktif di serata nengeri.
Nitihka penerang media Opis Pengerai Nengeri Sarawak (JKNS), kes majak nambah udah ngelui kapasiti ba makmal lalu timpuh dikena nentuka pemutus peresa taja sida udah nguna chara ‘outsource’.
“Pengawa tu udah ngemendarka sampel napi pengelaun sepengelama lima hari”
Berindik ari nya, opis iya sereta Komiti Mutarka Penusah Ngenyit Nengeri (JPBNS) Sarawak enggau Opis Menteri Pengerai (KKM) benung nerangka strategi dikena nagang igi penyakit COVID-19 ba timpuh ti deka datai.
“Enti sema kes udah ditemu enggau tumu lalu pengawa nagang ulih digaga enggau jampat,”
“Kami mega deka meda gaya COVID-19 lalu pengawa nyerurika strategi deka dipejalaika nitihka gaya ila,” ku iya madah dalam siti penerang media kena hari Minggu.
Ke rikod, ari penyampau 5,291 kes baru positif COVID-19, 99.9 peratus kes iya nya ba kategori satu ti nadai ngembuan sebarang kelai enggau kategori dua iya nya ngembuan kelai enda raya.
Kuching mengkang nyadi pelilih ti ngerikodka kes ti pemadu tinggi iya nya 1,845 kes, Ditangkanka Serian (620), Sibu (436), Bintulu (435), Bau (212), Samarahan (196), Sri Aman (162), Lundu (154), Betong (138), Miri (122), Sarikei (99), Mukah (96), Simunjan (80), Julau (74), Pakan (65), Kanowit (63), Asajaya (56), Tebedu (55), Subis (41), Kapit (37), Selangau (35), Limbang enggau Lubok Antu (33), Meradong (31), Saratok (29), Lawas (25), Matu (22), Dalat (19), Belaga (17), Pusa (16), Marudi (14), Tatau (12), Song enggau Sebauh (7), Bukit Mabong (3) sereta Beluru (2).
Kelimpah ari nya, bisi lapan kes pemati diripotka kena hari Minggu.
Nangkanka nya, bisi 2,808 kes udah gerai enggau dikemendarka pansut ari sepital ti nyadika penyampau semua ke udah gerai nambah ngagai 115,954 iku tauka 73.95 peratus.
JPBNS mega ngenukuka siti kluster baru iya nya Kluster Nanga Lasi Mit, Julau.
Entudika nya, bisi tiga kluster udah punas iya nya Kluster 511 Sentosa, Kuching, Kluster Kampung Seratau, Kuching, enggau Kluster Kampung Sungai Laruh, Kuching.
Tu nyadika penyampau kluster aktif di Sarawak iya nya 135 iti.
