KANOWIT, 11 Sept: Siku lelaki parai kena tangkap karan lebuh niki pun buah dabai ba Jalai Lukut-Penyulau, lemai kemari.
Tuai balai Bomba enggau Penyelamat (BBP) Kanowit, Arrahman Chik madah, raban bomba terus beguai ngesah tudah ba palan penusah ti nyadi urung pukul 4 lemai nya.
“Urung pukul 3.59 lemai kami nerima telefon telefon ari mensia mayuh ti madahka bisi siku kena tangkap karan ba pun kayu di Jalai Lukut-Penyulau,” ku iya dalam siti penerang kena Hari Enam.
Ku iya madah, endang amat bisi siku lelaki luput ba atas pun kayu peningi kira-kira 35 kaki.
Tudah ke bebadi nyawa tu benama Ting Siew Kiong beumur 52 taun.
“Raban bomba lalu minta tulung SESCO mutuska bekal elekterik dikena bejejaga sereta bantu ngena ‘Hydraulic Sky lift Crane Cage’ ke diempu kunteriktor SESCO ngambi lelaki nya tadi.” ku iya.
Lelaki nya mujur diangkah raban bomba enggau disahka pegawai perubat parai ba endur penusah nya nyadi.
Ku iya madah, lelaki nya lalu diserahka ngagai Polis Diraja Malaysia (PDRM) ngambi ulih bejalaika atur ke patut.
