MIRI: Projek Sarawak Sabah Link Road (SSLR) berengkah digaga ba bulan tu enggau dijangka tembu ba taun 2026.
Menteri Kereja Raya Datuk Fadillah Yusof madahka, projek renggat keterubah ba baruh opis menteri nya ngaul projek ngaga jalai alun sepemanjai 77 kilometer (KM) iya nya ari mengeri Lawas ke simpang jalai Long Lopeng.
“Penembu jalai tu ila ngemudahka rayat ba kandang menua ulu enggau menua pesisir mindah laban sebedau tu sida nengah jalai balak.
“Kelimpah ari nya, pemisi jalai tu ila mantu nyungkak sektor dagang temuai eko enggau pengawa betanam betupi ti nguntungka rayat ke mendam ba menua pesisir. Jalai tu mega ngemudahka sida nurun ke klinik enggau sekula,” ku iya madah lebuh bejaku ba simposium Pemar enggau Peluang Pemansang Infrastrakcha Ba Borneo nengah chara webinar maya hari Lima.
Fadillah madahka, projek Jalai Besai Pan Borneo renggat ti keterubah udah nyapai 70 peratus ba Sarawak enggau 56 peratus ba Sabah.
Iya nerangka, pakej kereja nya mungkur jalai besai sepemanjai 786 KM ti nyerangkung pengawa ngaga jematan ari Telok Melano ke Miri seraya 706 KM ari Sindumin ke Tawau.
“Opis menteri mega merambu deka ngangkat manah tikas jalai ari simpang Kuala Baram ke Kompleks Imigresen, Kastam enggau Kuarantin (CIQ) Sungai Tujoh) ti dijangka tembu ba taun 2025.
“Projek tu deka nyambung Jalai Besai Pan Borneo Sarawak ke tembu ba simpang Kuala Baram ke garis entara menua Sarawak enggau Sabah sereta ngurangka penyekut laban semina nya aja jalai ke Limbang, Lawas enggau Brunei naka ke diatu,” ku iya madah agi.
Kelimpah ari nya, iya madahka pemar ke suah ditapi lebuh ngaga Projek Jalai Besai pan Borneo iya nya pekereja pengawa enggau barang kena berumah, kurang kunteriktor enggau sub kunteriktor ari rayat menua tu, gaya topografi darat, belanja, sereta polisi enggau atur lebuh bejalaika pengawa ngaga projek nya.
