KUCHING: Mayuh tanah ba kandang menua pesisir ke bisi potensi ekonomi bedau diserungkai enggau dikemansangka lebih agi ari sukut betanam betupi sereta ngembuan asil kampung ke ulih nambahka asil penatai pemisi rayat.
Beduduk ari nya, pemansang infrastrakcha ti nyengkaum bungkur jalai alun enggau jematan nyadi kunchi mai pemansang ba serata kandang menua nya.
Sapit Kepala Menteri Tan Sri Dr James Jemut Masing madahka, perintah Sarawak iya nya Gabungan Parti Sarawak (GPS) ti dituaika Kepala Menteri Datuk Patinggi Abang Johari Tun Openg endang mekuhka pemansang infrastrakcha di serata nengeri tu.
Iya madahka, ambika chunto menua China ba taun 70-an kala nyadi entara menua pemadu seranta di dunya.
“Tang, 40 taun udah nya China nyadi entara menua pemadu kaya di dunya sekalika ari sukut asil penatai per kapita ngelui ari Amerika Syarikat.
“Pekara tu diripotka Jeffery Sachs ba dalam bup ke dikarang iya ‘The Price of Civilization (2012),” ku iya madah ba dalam siti penerang ti dikunsika ba laman facebook maya hari Enam.
Masing madahka, pekara ti dikemeratka perintah China iya nya pemansang infrastrakcha ti nyerangkung ngaga jalai alun, jematan, nyendiaka bekal karan enggau bekal ai ba serata menua nya nyentuk ke menua pesisir.
“China ngelangkar pelin ke chukup manah enggau silik lebuh ngemansangka infrastrakcha ba menua nya sereta perintah nguna agih belanja ke chukup besai,” ku iya madah.
Berindik ari nya, perintah Sarawak diatu ba singkang ke sama ngemeratka pemansang infrastrakcha ba baruh Pelin Malaysia Lumpar Ke-12 (RMK-12).
Masing ke mega Menteri Infrastrakcha enggau Pemansang Penyangkai Kapal madahka, iya deka meri sukung penuh ngagai Kepala Menteri Datuk Patinggi Abang Johari Tun Openg ba pengawa ngemansangka perengkaguna ti ngembuan tikas ke manah sekalika ba mengeri tauka di menua pesisir.
