KUCHING, 11 Sept:Opis Menteri Dagang Dalam Menua enggau Pekara Bebelika Barang(KPDNHEP)Sarawak ngeluarka 163 kompaun ketegal ngelanggar pentin Standard Atur Pengawa (SOP) Atar Nagang Pemindah (PKP)penyampau RM494,000.
KPDNHEP dalam siti penerang madahka , bisi 22,068 premis udah diperesa sepemanjai timpuh bejalaika pengawa matau tikas pengasi SOP PKP Akta 342 ari 13 Mei 2020 nyentuk 10 September 2021.
“KPDNHEP nengeri Sarawak udah ngerahka lebih 176 iku pegawai penerit adat di serata menua ti ngena pekayan ‘preman’ (enda ngena uniform) dikena nentuka premis dagang enda nyadi penyungkak besai ba pengekai igi penyakit Covid-19 dalam menua,”ku iya dalam penerang kena Hari Enam.
Operasyen ‘Ops Samar’ matau pengasi SOP betuaika Direktor KPDNHEP Putrajaya,Tuan Haji Azman di sebuah palan bebelika barang di Kuching.
Ku iya madah, kompaun dikeluarka ngagai pedagang enggau mensia mayuh ketegal ngelanggar SOP kelai KPDNHEP komited bejalaika OPS SAMAR pengudah program advokasi enggau jaku tangkan ngagai mensia mayuh sebedau tu.
Taja pia,bepelasarka ngagai statistik nya tikas pengasi sektor dagang ngidar di Sarawak ba tikas ti manah .
“Kompaun ke dikeluarka nyadika teladan ngagai memsia mayuh ngambika seruran nitihka atur ke udah ditetapka,”ku penerang nya.
Pengawa muka sektor dagang enggau ngidar iya nya sebagi ari chara dikena mulaika baru pemanah ekonomi domestik menua.
Berebak enggau nya, KPDNHEP minta semua bekerejasama ngelalau sida ti enda ngasika SOP bejalaika pengawa dagang nitihka atur ti ditetapka dikena nentuka pengelantang rayat.
