SRI AMAN: Sarawak diatu benung nyendiaka pengalih menua ngagai fasa endemik, lalu atur penama mensia ngagai menua tu siti pekara ti deka diperatika baru ulih Perintah Nengeri.
Taja pia, ku Kepala Menteri Datuk Patinggi Abang Johari Tun Openg, pekara nya agi nganti pemendar ari Opis Menteri Pengerai ti deka meda dulu gaya pengelekai COVID-19 ba menua tu.
“Siti pekara deka dipadahka aku ditu, ia nya kitai diatu mesti idup enggau COVID-19. Kes ba menua kitai majak niki. Taja pia mayuh ari kes nya ba baruh Kategori Satu, ia nya kes nadai kelai sereta enda raya,” ku iya madah ba siti aum penerang media di Sri Aman.
Abang Johari nambah agi, enti sema nengeri udah tama ngagai fasa endemik, semua orang mesti nanggung pengawa diri sereta nitihka Atur Pengawa Standard (SOP) enggau terit.
“Kitai deka meratika atur penama mensia ngagai Sarawak enti Opis Menteri Pengerai udah madahka kitai ulih ngalih ngagai fasa endemik,” ku iya.
Taja pan Sarawak ngerikodka penyampau orang ke udah betuchuk vaksin ti tinggi, Abang Johari madah proses ngalih ngagai fasa endemik dipelabaka lama laban perambu sereta strategi deka digaga dulu.
Nangkanka nya, Chairman Komiti Mutarka Penusah Ngenyit Nengeri Sarawak Datuk Amar Douglas Uggah Embas madahka SOP ti bisi diatu agi dikena, nyengkaum atur pasal timpuh kuarantin lebuh maya tama ngagai Sarawak.
“Naka kediatu, SOP ngelama tu agi dititih, nyengkaum 14 hari kuarantin enti tama ngagai Sarawak,” ku iya.
