KUCHING, 10 Sept: Pengekai igi penyakit Covid-19 udah sebagi enggau pengidup ninting hari kitai laban Malaysia dijangka deka masuk ngagai fasa endemik Covid-19 ba pengujung bulan Oktober tu.
Menteri ba Opis Menteri besai (Parlimen enggau Undang-undang), Datuk Seri Wan Junaidi Tuanku Jaafar madahka, sebedau ngagai fasa endemik abis nadai 80 peratus ari rayat di menua tu mesti udah nembuka dua dos vaksin.
“Udah maya iya kitai nerima Covid-19 tu nyadi endemik. Nya alai, kitai mesti ngambi atur bejejaga laban virus tu udah enggau kitai,” ku iya dalam laman facebook rasmi iya sehari tu tadi.
Ku iya nambah, mayuh orang agi saru bida entara pandemik enggau endemik.
Rayat patut nerima konsep hidup begulai enggau virus tu taja pan menua mujur nagang pengekai Covid-19.
“Pandemik tu dikumbai penyakit baru ti mungkur populasyen ke besai di serata menua.
“Endemik iya nya penyakit ti seruran bisi enggau kitai tang ba tikas ti ulih dijaga baka penyakit denggi,” ku iya nerang.
Junaidi mega ngelalau mensia mayuh seruran nyaga pengerai, ngemeranka Standard Atur Pengawa (SOP) baka ngena sengkabung mua enggau ngambi tuchuk vaksin ba gaya pengidup dalam norma baru.
