BAU : Semua raban nembiak ba pelilih Tasik Biru deka nerima tuchuk vaksin COVID-19 lalu nadai nembiak deka ditinggalka ari program nya.
Kaban Kunsil Nengeri (ADUN) Tasik Biru, Datuk Henry Harry Jinep madah, enti sema bisi raban nembiak ke enda ulih datai betuchuk vaksin maya nya ketegal dikuarantin, bisi penanggul perengka pengangkut tauka tepekul ketegal Atur Nagang Pemindah Diteritka Agi (PKPD), nama sida tu ila deka diberi raban sekula ngagai Opis Pengerai Pelilih (PKD) Bau.
Ku iya madah agi, raban PKD Bau deka bejalaika pengawa “mopping” iya nya ngiga hari bulan ti baru ungkup sida ke bisi penanggul datai ba maya ti udah ditetapka.
“Program betuchuk vaksin ungkup raban nembiak dipelabaka tembu kena 3 Oktober siti nyin ila. Bagi SMK Singai, dos keterubah deka diberi kena 9 September lalu dos kedua diberi kena 30 September tu ila,” ku Henry.
“Program ti sebaka deka diatur ba SMK Bau kena 10 September ungkup dos keterubah lalu 1 Oktober ungkup dos kedua,” ku iya nambah agi.
Iya bejaku munyi nya lebuh matau Program Betuchuk Vaksin COVID-19 Menua (PICK) ungkup orang beumur 16 ngagai 17 taun di SMK Singai maya Hari Empat.
Berindik ari nya, iya madahka bisi 2,025 iku nembiak dipelabaka nerima vaksin bansa Pfizer nengah program betuchuk vaksin nembiak.
Kelimpah ari nya, dalam penerang iya senentang internet pechuma ngagai nembiak Institusyen Pelajar Tinggi (IPT) di pelilih Tasik Biru, Henry madahka pekara nya diatur ngambika semua nembiak dia ulih belajar enggau naka pemanah.
Ku iya nambah agi, tiga endur ti ditetapka bisi internet pechuma ia nya Palan Servis N.2 Tasik Biru ungkup pasar Bau enggau genturung pendiau dia, 1Singai ungkup pelilih Singai enggau Tondong, lalu ketiga ba Heritage Cafe ungkup pelilih Jagoi enggau endur ti semak dia.
“Palan servis deka nyendiaka servis internet tu ba tiap iti endur ngambika nembiak bulih akses internet UNIFI enggau pechuma,” ku Harry agi.
Ba tiap endur ti bisi servis internet, urung 20 ngagai 40 nembiak dipelabaka bisi ngena perengka guna nya ninting hari.
