PADAWAN: Opis Pengerai Bagi Menua Kuching udah meri pemendar ngagai lima pasar ba baruh patau Opis Kaunsil Pelilih Padawan (MPP) dibuka baru.
Ku Chairman MPP, Lo Khere Chiang madah entara pasar ke dikemendarka dibuka baru iya nya Pasar Batu Tiga, Pasar Batu Tujuh, Pasar Batu Sepuluh, Pasar Sementara Desa Wira enggau Cat’Walk Street Market.
Sebedau tu, ku Lo madah, Opis Pengerai Bagi Menua Kuching udah mutuska nutup sekeda pasar ketegal deka nyaga pengelikun mensia mayuh.
Berindik ari nya, iya ngelalau semua orang ngambika seruran bejejaga ketegal mayuh kes covid-19 ke nyadi ba pun ari pasar.
“Ngambika pasar tu enda ditutup agi, aku minta kita mesti nentuka diri gerai sereta selamat dulu sebedau masuk ngagai pasar tu. Enti bisi ngasaika diri positif, taka pengangat tubuh tinggi tauka enda nyamai isi anang tama ngagai pasar tu. Kebuah pia lebuh kita tama ngagai pasar tu, peluang kita ngerampit orang bukai chukup tinggi.
Lo ke mega Kaban Kunsil Batu Kitang pechaya raban opis Kaunsil terus matau tetiap pedaja enggau orang ke datai ngagai endur nya nengah aplikasyen MySejahtera.
Iya ngarapka orang ke datai ngagai pasar nya ngambika seruran bejejaga ngambika pasar enda ditutup agi.
“Baka ke dipadahka aku tadi, enti kita meda chura kuning tauka merah ba MySejahtera, ngarapka kita ulih terus diau ba rumah aja. Kebuah pia, tu sebagi ari tanggungpengawa kita nentuka pengerai,” ku iya nambah agi.
Tanggungpengawa tu ukai semina bepanggai ba pedaja ba pasar tauka Opis Kaunsil tang semua orang patut besaup nyaga komuniti ari dirampit penyakit COVID-19.
