BINTULU: Dua iku lelaki peranak menua luar mujur ditangkap polis ari Opis Tasat Jenayah Narkotik Indu Opis Pelilih (IPD) Bintulu enggau ngerampas dadah bansa syabu pemerat 72 gram ti berega RM7,200 ba Kampung Wawasan Jaya, Jalai Bintulu-Miri maya hari Tiga.
Ngambi penerang ari UKAS, Tuai Polis Pelilih Bintulu Supt Zulkifli Suhaili madahka, polis udah ngerap sebuah rumah ti nadai lumur ba genturung pendiau nya urung pukul 1.00 lemai.
Berebak ari pengawa ngerap nya, polis ngetan dua iku lelaki ti beumur 20-an disangka bejalaika aktiviti nyual dadah.
“Asil ari pengawa ngerap ba dalam rumah nya, polis tetemuka 17 paket plastik enggau tujuh tiub straw ke ditepu igi kristal ti dipelabaka dadah Methamphetamine tauka syabu pemerat 72 gram berega RM7,200 ba dalam beg sandik.
“Asil peresa madahka kedua-dua saspek nya positif dadah bansa syabu,” ku iya madah.
Ku Zulkipli madah agi, kedua-dua saspek direman sepengelama 14 hari ba pun ari 9 nyentuk ke 22 September.
Kes nya ditasat ba baruh Seksyen 39B Akta Dadah Berbahaya 1952 enggau Seksyen 15(1) Akta Dadah Berbahaya 1952.
Kelimpah ari nya, kedua-dua saspek nya ditasat ba baruh Seksyen 6 (1)(c) Akta Imigresen 1959/63 ketegal nadai ngembuan dokumen pengelala diri.
Iya mansutka jaku nya ba aum media maya hari Empat.
