KUCHING, 8 SEPT: Raban polis mujur nangkap siku lelaki bansa Melayu ti dipechaya ngereja penyalah ngerumpak enggau ngeruntun mensia mayuh ba mengeri Kuching apin lama ke udah.
Tuai Polis Pelilih Kuching, ACP Ahsmon Bajah madahka raban polis udah nerima dua ripot bekaul enggau pengawa ke dikereja lelaki nya ba hari ke sama iya nya 3 September 2021 tang ba endur ke bebida.
“Lelaki nya udah ngereja penyalah nya ba dua endur ke bebida iya nya di Taman Hui Sing, Sekama enggau di Stutong Komersil Centre Tabuan Jaya.
Ku Ahsmon madah agi, bisi dua iku udah ngaga ripot ti madahka seduai diruntun lelaki tu ke ngena sebuah mutosikal ti nadai lumur rejister lebuh pulai meli barang ba pasar.
“Saspek tu ngeruntun marik emas ke dikena seduai ti ngujungka seduai tu rugi RM4,300,” ku Ahsmon nambah agi.
Berindik ari nya, seraban polis ari IPD Kuching ti nyengkaum Opis Tasat Jenayah Pelilih Kuching, Balai Polis Sekama enggau Balai Polis Tabuan Jaya udah bejalaika operasyen nangkap lelaki tu.
Asil ari operasyen nya, sida mujur nangkap lelaki tu ba Jalai Tabuan Melayu, Kuching lalu entara barang ke dirampas iya nya sebuah mutosikal, tupi kelidar ke diguna saspek lebuh ngereja penyalah nya.
Pia mega, asil tasat tetemuka saspek ngaku ngereja dua penyalah ngeruntun nya lalu raban polis diatu benung bejalaika operasyen nyidi endur barnag ke diruntun saspek.
Bepelasarka rikod, saspek bisi 15 rikod jenayah lama iya nya siti rikod jenayah ngeruntun, dua jenayah ulah kasar lalu 12 rikod agi bekaul salah guna dadah.
Kes ditasat ba baruh Seksyen 392 Kanun Keseksaan iya nya ngerumpak enggau ngeruntun nadai ngena senyata ti ulih ditinggang ukum jil sepengelama ke ulih nyentuk ke 14 taun lalu diukum mayar mata duit tauka dilunsin.
