KUALA LUMPUR, 8 SEPT: Lembaga Hasil Dalam Negeri Malaysia (LHDNM) udah ngagihka 1,059 bakul pemakai ngagai raban ke patut nerima bantu nya ba sekeda nengeri di menua tu.
Tebal agi, bantu nya deka diberi ngagai sida ke tekeruga ketegal pengekai igi penyakit COVID-19 di Pahang, Sabah enggau Sarawak nengah Program CSR Hasil Prihatin.
Ngambi ripot berita ari Bernama, Opis Tuai Pegawai Eksekutif Begian Komunikasyen madahka, di Miri program nyerahka 200 bakul pemakai ngagai Palan Pengintu Pengelantang Komuniti Bagi Menua Miri enggau ba Baitulmal Bagi Menua Miri.
Berebak ari nya, bekal pemakai nya diagihka ngagai peranak ke diau semak endur nya enda milih bansa tauka batang pengarap.
“Pemeri nya diserahka Malanie Sullivan, Pegawai Opis Residen Miri enggau Naharuddin Nurdin, Direktor Pampang Miri ngagai pengari JKM Miri sereta Baitulmal Miri,” ku penerang nya madah.
Naka 7 September 2021, bisi 8,829 bakul pemakai udah diserahka ngagai peranak ke tekeruga ketegal COVID-19 di Malaysia.
“Pekara tu seririh enggau aspirasyen perintah ti ngemeratka konsep prihatin enggau seruran meri perati ba pengawa nyaga pengelantang rayat,” ku iya madah agi.
Program CSR Hasil Prihatin ti dilancharka Menteri Pekara Wang kena 31 Julai 2021 ke udah deka diteruka enggau dikemesaika agi ba serata menua tu.
