KUCHING: Sarawak maya hari tiga ngerikodka semilan kes pemati iya tiga di Kuching, dua di Kapit lalu di Bintulu, Sarikei, Subis, Tatau enggau Bau bela ngerikodka siti kes pemati.
Komiti Mutarka Penusah Ngenyit Negeri Sarawak (JPBNS) madahka, semila ari kes pemati tu ngaul orang tuai umur iya nya entara 50 nyentuk ke 80 taun lalu siti kes pemati ngaul nembiak berumur 20 taun.
Kesemua kes pemati tu ngaul sida ke bisi rikod penanggul pengerai baka penyakit darah tinggi, sakit tungkul sengayuh, sakit jantung, kencing manis enggau obesiti.
Kelimpah ari nya, Sarawak udah ngerikodka dua kluster baru iya nya Kluster Lemujan Pakan enggau Kluster Pasar Matu, Matu.
JPBNS madahka Kluster Lemujan Pakan tu iya nya kluster komuniti ti ngaul sebuah rumah panjai ba pelilih nya lalu bisi 38 iku udah ditetapka positif , empat negatif lalu bisi 37 kes baru diripotka maya hari empat.
Kluster Pasar Matu ngaul siti endur gawa ti disidi ngaul pekereja enggau orang ke ngempu premis sebuah kedai makai ba Pasar Matu lama, Pekan Matu di Matu.
Nadai kluster udah punas diripotka maya hari empat lalu tu ngujungka bisi 146 kluster mengkang aktif.
Berindik ari nya, Sarawak ngerikodka 3,100 kes maya hari empat ti ngujungka penyampau semua kes nambah ngagai 141, 912.
Kuching mengkang nyadi pelilih ti ngerikodka kes ti pemadu tinggi iya nya (804) ditangkank Sibu (379), Samarahan (252), Bintulu ( 231), Lundu (155), Bau (152), Asajaya ( 133), Miri (91), Betong (84), Sri Aman (83), Simunjan (71), Serian (69), Pakan (67), Song (66), Subis (64), Pusa (47), Kapit (45), Mukah (38), Saratok (37), Tebedu (36), Tatau (32), Limbang (24), Sarikei (21), Lubok Antu (20), Lawas (19), Julau (19), Selangau (18), Matu (11), Kanowit (9), Meradong (5), Marudi (5), Kabong (4), Beluru (3), Sebauh (3), Belaga (1), Bukit mabong (1) enggau Telang Usan (1)
Ari semua kes tu, 575 bisi ngayanka kelai, lalu 2525 nadai ngayanka kelai.
