PUTRAJAYA: Institut Belajar Deriba (ILP) ba serata menua dikemendarka dibuka kena hari empat tu dalam timpuh Pelin Mulaika Pemanah Menua (PPN) nengah chara netapka hari bulan.
Pekara tu dipadahka Menteri Perengka Pengangkut Datuk Seri Dr Wee Ka Siong maya hari dua lebuh meri penerang senentang agih belanja 2022.
Taja pan ILP dikemendarka beoperasyen ba timpuh nya, proses ngambi lisin deriba semina dikemendarka ba pun ari 17 hari bulan sembilan tu.
Wee mega madahka, pemendar ari Kaunsil Pengelikun Menua (MKN) bepelasarka Standard Atur Pengawa (SOP) PPN nguna chara berenggat ti udah ditetapka.
Kelimpah ari nya, pekerja, tenaga pengajar tauka chalun patut udah tembu nerima vaksin Covid-19 lalu mantaika setipikit digital betuchuk vaksin covid-19 enggau kad pengelala.
Institut dikemendarka dibuka nitihka kapasiti pekereja sereta peratus pekerja ke udah nerima vaksin.
“Enti nyema 40 peratus pekerja ILP udah nerima dua dos vaksin, institut dikemendarka beoperasyen 60 peratus kapasiti pekereja. Lalu enti 60 peratus tembu divaksin penuh, tau beoperasyen nyentuk ke 80 peratus pekerja,” ku iya.
Serikat mega dikemendarka beoperasyen enggau kapasiti 100 peratus enti nyema 80 peratus pekerja udah nerima dua dos vaksin.
Nangkanka nya, pekereja tauka chalun ti bisi ngembuan kelai sakit tauka benung bejalaika timpuh atur nagang pemindah ditertika agi (PKPD) enda dikemendarka datai ke ILP.
Wee mega madahka Opis Menteri Perengka Pengangkut udah mutuska deka meri moratorium sepengelama tiga bulan nyentuk ke 30 haribulan 11 tu ngemaruka permit Institut Belajar Deriba ti sema permit udah abis timpuh entara bulan satu nyentuk ke bulan sembilan 2021.
Berindik ari nya, Wee ngarapka muka baru ILP tu ulih meri pengelantang ngagai pengempu ILP, raban pengajar tauka mensia mayuh ti begunaka servis nya.
Titihka TVS ba Telegram, Facebook, Twitter, Instagram, TikTok enggau YouTube.
