BETONG, 8 SEPT: ‘Circuit Breaker’ dipejalaika ba Bagi Menua Betong ti nyengkaum pelilih Betong, Saratok, Pusa enggau Kabong ba pun ari 9 September nyentuk ke 22 September 2021.
Ku Komiti Mutarka Penusah Ngenyit Bagi Menua (JPBB) Betong ba dalam siti penerang madah, semua aktiviti ekonomi ba Betong enda dikemendarka dibuka ari pukul 6 pagi nyentuk ke pukul 7 lemai.
“Aktiviti bejual ba pasar tamu enda dikemendarka beoperasyen.
“Aktiviti nyendiaka bekal barang, bedaja tauka nyual pemakai ke dikemendarka iya nya semina bai pulai tauka ‘take away’, pandu lalu (drive thru), enggau nengah servis nganjung pemakai (COD) ari pukul 6 pagi nyentuk ke pukul 7 lemai aja,” ku JPBB Betong madah.
Kelimpah ari nya, sesiku orang tauka orang ke beraban enda dikemendarka ba palan mensia mayuh ba pun ari pukul 10 malam nyentuk 5 pagi enti sema nadai kebuah berat.
“Semua aktiviti ngelantangka ati enggau rekreasyen enda dikemendarka.
“Pia mega, pengawa baka pengerami melah pinang, hari pengada, hari beserara, sereta program begelumu ke bukai enda dikemendarka ba sepemanjai timpuh nya,” ku iya madah agi.
Aktiviti pengarap mesti nitihka kapasiti ti udah ditatak sepemanjai timpuh Circuit Breaker dipejalaika ba Betong.
Enti sema bisi pengawa ngubur, rabat mesti deka dipadahka ngagai Opis Pelilih tauka Opis Pelilih Mit ke besemak.
