KUCHING, SEPT 7 : Pandemik COVID-19 ngeruga pengelikun enggau pengelantang rayat di serata dunya, ti ngujungka bala apai indai balat endar irau ati.
Ketebal agi, lebuh sekula deka berengkah dibuka baru ila.
Taja pia sida meri besai terima kasih ngagai perintah laban ngemendarka nembiak ke beumur 12 nyentuk 17 taun nerima tuchuk vaksin.
Sekula deka berengkah dibuka kena 3 hari bulan 10 enggau chara bererenggat.
Nembiak ulih betemu enggau kaban sekula sida sereta ulih belajar betunga mua enggau bala pengajar.
Ku presiden Gerempung Pengajar Sarawak (STU) Adam Prakash madah, bala pengajar enggau nembiak mayuh napi pemar lebuh bejalaika pengawa Ngajar Enggau Belajar Ari Rumah (PDPR).
Taja pia, program betuchuk vaksin ungkup nembiak baruh umur meri pengaga ati ngagai sida.
“Tu siti peluang ngambika sida belajar di sekula sepengudah nerima tuchuk vaksin tu ila,” ku Adam madah lebuh dikerandau kilah ensana.
Prakash mega ngelalau bala apai indai ngasuh anak sida nerima tuchuk vaksin nya.
Ku iya nambah agi, sepengudah sesi sekula udah beoperasyen, bala nembiak mudah dirampit virus lalu meri penanggul ngagai orang bukai.
“Tu ila ulih dikena nyaga pengerai enggau pengelikun kitai,” ku iya nambah agi.
Berita senentang pengajar ti enggai nerima tuchuk vaksin, Adam Prakash madahka sida nadai data senentang perkara nya tang mayuh pengajar udah nerima tuchuk vaksin.
Ba awak ke sama, dua iku kaban Parti Rayat Sarawak (PRS) exco belia ngelalau semua pengajar anang enda nerima tuchuk vaksin.
Ku Surai Abell enggau Samuel Kuek madah, pengawa tu ulih ngujungka pengajar bukai sereta pekereja perintah enggai nerima tuchuk vaksin.
“Kami sigi setuju enti pengajar udah nerima tuchuk vaksin lalu nyambung pengawa ngajar bala nembiak kitai,”
”Enggau chara tu iya nya enda belaban enggau profesyen sereta pengawa sida. Berebak enggau nya, kedua-dua nembiak enggau pengajar bela likun,”
“Pengajar kitai mesti nguna manah latih ti diberi ke sida dikena nentuka pengelikun enggau pengelantang ngagai nembiak sekula,” ku sida madah dalam siti penerang.
Sida nyemetak madah agi, tu siti chara bagi ngemansangka tauka ngangkatka menua kitai sereta nyapai imuniti beraban.
