KUCHING, 06 SEPT : Sapit Kepala Menteri Datuk Amar Douglas Uggah Embas temegah ati meda raban ti gawa di luan chakah bejalaika pengawa.
Berindik ari nya, sepengudah Datuk Amar Douglas Uggah Embas nemuai ngagai ‘One Stop Centre’, iya nya palan alai beperesa ‘swab’ tauka chulik dia iya lalu betelefon ngagai Encik Cooplay Nyipa Aji, siku pesereta di Palan Tibang Pemakai (TKPM) Rampangi, Kuching.
Cooplay madahka Uggah berasai temegah ati meda raban gawa di luan baka lutor, indu misi, Rela, Polis, enggau bala volunteer ke chakah gawa enda ngira jam enggau hari ba alai orang beperesa ‘swab’ di ‘One Stop Centre’, MBKS. Nya alai, Uggah lalu meli 310 igi buah Golden Melon ari TKPM lalu dianjung ngagai MBKS.
“Datuk Amar telefon ngagai aku, madahka diri temegah ati meda raban gawa di luan ti chakah bejalaika pengawa ba MBKS. Dia iya lalu meli 310 igi buah Golden Melon ari TKPM, lalu dianjung aku empu maya hari minggu tu tadi ngagai MBKS”, ku iya.
“Sekretari Politik ngagai Kepala Menteri Sarawak iya nya Encik Petrus Igan ngarika Datuk Amar nyuaka bantu tu ngagai Dr Siti, iya nya siku pengatur pengawa peresa ‘swab’ ba MBKS”, ku Cooplay lebuh dikerandau pengarang berita TVS.
Cooplay ke mega Chairman Palan Tibang Pemakai (TKPM) Rampangi meri besai terima kasih kelebih agi ngagai Datuk Amar Douglas Uggah Embas laban ke udah mantu meli buah Golden Melon tu laban makit tauka tamu mayuh tutup berindik ari pandemik COVID-19 ti majak ngekai di menua tu.
Kelimpah ari nya, Cooplay enggau bini iya Freda Siggie nyual buah tu nengah chara dalam tali arus (online) iya nya nengah Facebook seduai empu. Ukai semina nyual buah nya aja tang mayuh agi utai tanam ke bukai ke dijual seduai baka chabi, timun jepun, sayur ensabi enggau ke bukai.
Cooplay tu siku Ex-injinir ti udah ngaul diri ba pengawa betanam betupi chara moden kenyau ari taun 2018.
