SRI AMAN, 6 Sept: Bisi 300 iku penerima bantu bakul pemakai dalam ‘Program Sejambak Kasih’ ke diatur Gerempung Ngemanahka Ulah Che Chuan Khor Sri Aman.
Pengawa nyuaka bantu nya dipenyadika Menteri Muda Pengelantang Komuniti, Datuk Francis Harden Hollis ti diterima Goh Kaw Tze.
Harden ke mega Kaban Kunsil Nengeri (ADUN) Simanggang madah, pemeri bantu tu dikena nentuka raban ke tekeruga bisi bekal pemakai.
Program Sejambak Kasih iya nya aktiviti bemusim ti meri bantu ngagai raban ke suntuk ari gerempung nya.
Pengawa tu dipejalai enggau ngemeranka standard atur pengawa (SOP) ke terit kelai penyinu sereta tanggungpengawa gerempung mantu ngelempungka tating penusah komuniti lebih agi napi empas pengekai igi penyakit Covid-19.
Ba awak ke sama, Harden bisi nyerahka chek Projek Mit Menua Pesisir (Mrp) ngagai Simanggang Soon Heng Society enggau Gerempung Ngemanahka Ulah Che Chuan Khor Sri Aman bela sepenyampau RM5,000.
Berebak enggau nya, Harden meri terima kasih ngagai raban ke udah nulung meri bantu ngagai Gerempung Ngemanahka Ulah Che Chuan Khor Sri Aman nyentuk ke mujur melanja ungkus bantu bakul pemakai.
