KUCHING : Polis Sarawak mansutka 454 iti kompaun ketegal ngelanggar standard atur pengawa (SOP) Atur Nagang Pemindah (PKP) baruh Pelin Mulaika Pemanah Menua (PPN) ba Pelilih Kuching dalam timpuh 1 ngagai 30 Ogos 2021.
Tuai Polis Pelilih Kuching ACP Ahsmon Bajah madah penyampau semua kompaun nya RM820,500 sepemanjai timpuh nya.
Nitihka penerang infografik, semua kompaun dipansutka nitih Akta Nagang Enggau Nyeliahka Penyakit Berampit 1988 (Akta 342).
Ba awak ti sebaka, Ahsmon madahka bisi 15 iti kompaun ngagai sekeda orang dalam premis dagang enggau kilang mega dipansutka sepemanjai timpuh nya enggau penyampau RM36,500.
Kelimpah ari nya, tiga premis dikompaun RM30,000 ketegal ngelanggar pentin SOP.
Senentang permit, iya madah polis udah ngemendarka 10,790 iti permit ba pelilih tu tang peminta 488 permit bukai ditulak.
Bisi 273,025 perengka pengangkut diperesa sepemanjai timpuh bulan Ogos taun tu.
Ari peyampau nya, 265 perengka pengangkut diasuh nikal lalu 335,353 iku orang diperesa.
