KUCHING, 5 SEPT: Sarawak diatu benung besedia deka meri vaksin ngagai raban nembiak ke beumur baruh 18 taun ngambika ulih nyaga sida ari dirampit igi penyakit COVID-19.
Chairman Komiti Mutarka Penusah Ngenyit Nengeri (JPBN) Sarawak Datuk Amar Douglas Uggah Embas madahka, program meri vaksin nya dijangka deka dipejalaika ba pun hari tiga minggu baru.
“Kami diatu benung besedia deka bejalaika program betuchuk vaksin tu. Menteri Pengerai Khairy Jamaluddin kemari udah madahka senentang program tu deka dikemesaika ba serata menua lalu Sarawak nengeri ti keterubah bejalaika program tu.
“Khairy madahka pekara nya endang engkeman laban nengeri tu udah nyapai 80 peratus orang besai tuai udah nerima tuchuk vaksin,” ku iya madah ba dalam siti penerang maya hari Minggu.
Ku Uggah ke mega Sapit Kepala Menteri madah, enti sema semua pekara ke bekaul udah sedia penerang senentang pengawa meri vaksin nya deka ditesau ngagai mensia mayuh.
Beduduk ari nya, Uggah ngansak sekeda ari rayat di nengeri tu ke agi nulak ari divaksin ngambika lengkas agi nerima vaksin.
“Kitai bisi 62 palan betuchuk vaksin ti nyerangkung PPV perintah enggau klinik pengerai ke agi dibuka ba serata nengeri.
“Anang enda ingat hari ti kepenudi nerima tuchuk dos satu iya nya pagila kena 6 September 2021. Sida ulih terus datai ke PPV tauka klinik pengerai ke besemak enda ibuh netapka hari bulan datai betuchuk vaksin,” ku Uggah madah.
Nangkan ke nya, sida ke udah nerima dos satu ulih datai baru ke palan nya nerima dos kedua sepengudah 21 hari.
Uggah madahka, enti sema sesiku orang nya bedau nerima vaksin, sida ulih meri penanggul pengerai ngagai orang bukai lebih agi orang ke diau semak sida.
“Diatu kitai napi mayuh kes positif baka Varian Delta ke dipeda jampat ngekai enggau berampit sereta ulih nabanka nyawa,” ku iya madah agi.
