YAN : Bisi 2,500 iku pengajar ke enggai nerima tuchuk vaksin COVID-19 deka diberi pengawa bukai di sekula lebuh sekula dibuka baru ila.
Tu ketegal sida enda dikemendarka ngajar betunga mua enggau bala nembiak dalam kelas.
Menteri Kanan Pelajar Datuk Dr Radzi Jidin madahka bisi mayuh pengawa bukai di sekula ti ulih digaga bala pengajar tu ila.
“Ba awakka sama mega, kami benung berunding enggau Opis Servis Pekereja Perintah (JPA) pasal chara mutarka pengajar ke enggai nerima tuchuk vaksin tu, lalu aku mega deka nguji betemu sereta berunding enggau sekeda ari sida,” ku Radzi.
Iya bejaku munyi nya ba siti aum media di Sekolah Kebangsaan Haji Nyak Gam sehari tu sepengudah iya ngelawa endur ti dituntung penusah bah ba pelilih nya ti nyadi kena 18 Ogos suba.
Nangkanka nya, Radzi madahka Opis Menteri Pelajar (KPM) netapka pengajar ke enggai nerima tuchuk vaksin COVID-19 enda dikemendarka ngajar betunga mua dalam kelas tauka betemu enggau nembiak lebuh sekula dibuka kena 3 Oktober tu la.
Kebuah pia, ngambika apai indai nembiak arap kandang sekula anak sida likun.
Pia mega, Radzi madah raban sekula mega benung bejalaika pansik sereta belematika dulu timbal ari apai indai sekalika ngemendar anak sida nerima tuchuk vaksin COVID-19 tauka enda.
“Kami agi nganti timbal ari bala apai indai. Pekara tu semina dikena nanyaka penemu ari sida laban sebarang pekara ti bekaul enggau meri vaksin tu ba baruh kuasa JKJAV (Komiti Khas Jamin Bekal Vaksin COVID-19) enggau CITF (Raban Pekereja Khas Program Betuchuk Vaksin COVID-19),” ku Radzi agi.
