KAPIT, Sept 3: Penusah tanah tusur ti ngaul 32 buah pintu rumah panjai nyadi ba Rumah Bansa Anak Langgak, Nanga Sebilat, Gaat, Baleh Kapit.
Ku Tuai Balai Bomba enggau Penyelamat Kapit, Erwandy Tugor madah, sida nerima ripot bekaul penusah nya ari Pegawai Pelilih (DO) Douglas Pungga nengah aplikasyen Whatsapp Komiti Mutarka Penusah Ngenyit Bagi Menua Kapit.
“Raban bomba ngambi timpuh lebih kurang dua jam 30 minit sebedau datai ba endur penusah ke nyadi nya lalu tepedaka tanah tusur udah ngerusak endur ba mua rumah panjai nya.
“Penusah nya ngujungka sekeda strakcha stor peranak ba dia runtuh,” ku iya madah nengah siti penerang maya hari Lima.
“Beduduk ari nya, bomba udah masang tali bomba ba endur tanah runtuh nyadi tanda gerah ngagai peranak dia anang nengah endur nya ti dipelabaka ujan bangat ke enda ngetu ngasuh tanah tusur nyadi baru.
“Peranak ba rumah panjai dilalau ngambika enda nengah endur nya sementara nangika ujan bangat ke enda ngetu ngujungka tanah tusur nyadi baru,” ku iya madah agi.
Iya madahka, naka ke diatu peranak ba rumah panjai nya enda dipinta mindah sementara laban penusah nya enda ngerusak strakcha rumah panjai.
Taja pan pia, peranak dia dilalau ngambika seruran bejejaga dikena nyeliahka penusah bukai ke enda disadang nyadi.
“Nadai kes bebadi nyawa enggau bakal diripotka naka ke diatu,” ku iya nambah agi.
Ejensi bukai ke berumban ngelawa endur penusah nya nyengkaum Polis, Raban Pengetan Pengelikun Periman Malaysia (APM), Opis Kereja Raya (JKR) enggau Opis Pengintu Pengelantang Raban Bansa (JKM).
Titihka TVS ba Telegram, Facebook, Twitter, Instagram, TikTok enggau YouTube.
