KUCHING: Kes COVID-19 ba Sarawak dijangka majak nambah dalam timpuh empat minggu ti deka datai tu berindik ari pengawa Perintah Sarawak ti nambah peresa ngena chara mekal kit RTK Rapid Antigen ti ngayanka pemutus ti jampat agi.
Menteri Kaunsil Kandang Menua enggau Pengawa Berumah, Datuk Seri Dr Sim Kui Hian madah, kes ti dirikodka naka 2 September manggai tikas ti tinggi ia nya 2,994.
Iya madahka rikod nya ngayanka pengekai igi penyakit COVID-19 dalam komuniti ti majak nambah dalam timpuh 14 hari ti udah.
“Kitai deka ngerikodka mayuh kes ba minggu baru ti deka datai lebuh mayuh fasiliti perubat bejalaika peresa swab (chulit), enda baka ba Semenanjung ti semina bejalaika peresa swab ngagai sida ke bisi ngayanka kelai aja ti ngujungka kes dipeda nurun tauka kurang,” ku iya madah dalam siti penerang ti dikunsika iya ba laman rama iya kemari.
Dr Sim nerangka, Perintah Sarawak udah ngemendarka RM2 juta dikena meli kit RTK Rapid Antigen berindik ari peminta ari Opis Pengerai Nengeri Sarawak ngambika dikena sekeda fasiliti pengerai bejalaika peresa ti mansutka pemutus ti jampat agi.
“Aku dipadahka senentang Palan Sekali Ngetu COVID-19 (COSC) ba Dewan Komuniti MBKS udah mupuk ngena kit RTK Rapid Antigen tu kena bejalaika peresa.
“Urung 50 peratus ari 2,774 iku orang ke datai ngelawa COCS kemari bejalaika peresa ngena kit peresa jampat,” ku iya.
Ku Dr Sim ke mega Penyanding Penemu Komiti Mutarka Penusah Ngenyit Nengeri Sarawak (JPBNS), Menteri Pengerai Khairy Jamaluddin bisi madahka COVID-19 deka nyadi endemik ti ngujungka semua kitai mesti nerima lalu idup enggau virus nya.
Iya madah, reti endemik iya nya penyakit ti endang semampai bisi dalam komuniti tauka ba sesebengkah endur lalu dijangka semampai bisi kes tang ba tikas ti baruh.
Ambika chunto, penyakit denggi enggau renga nya penyakit endemik di Malaysia.
Titihka TVS ba Telegram, Facebook, Twitter, Instagram, TikTok enggau YouTube.
