KUCHING: Polis udah mujur nangkap 39 iku orang ketegal salah nguna dadah di Kuching sepemanjai timpuh bulan Ogos.
Tuai Polis Pelilih Kuching Ahsmon Bajah madah, entara 39 iku ke ditangkap nya bisi 37 iku lelaki ke berumur entara 18 ngagai 56 taun lalu dua iku indu beumur entara 24 ngagai 34 taun.
“Lapan iku ari sida ke ditangkap tu ngembuan mayuh macham rikod penyalah lama,” ku Ahsmon.
Dalam ‘Ops Pusher’ tu, raban polis mujur ngerampas mayuh bengkah dadah enggau pemerat urung 7.1 kilogram, sereta 17,887 pil ecstasy sereta 151 igi pil Eramin 5.
“Penyampau semua dadah ti dirampas ia nya RM1.07 juta,” ku Ahsmon dalam siti penerang maya Hari Empat.
Kelimpah ari nya, bisi dua buah kerita mega udah dirampas ia nya Mitsubishi enggau Axia ti beungkus RM90 ribu.
Bisi 43 iti kertas tasat udah dibuka ba baruh Seksyen 39B, 39A, 12(2), 15(1) enggau Seksyen 6 ADB 1952.
Pengawa nasat enggau dakwa benung dipejalaika.
Barang sapa ke bisi penerang senentang pengawa salah nguna dadah tau betelefon ngagai lumur 082-332522.
