KUALA LUMPUR, 2 September: Menua dipelabaka deka tama ngagai fasa endemik Covid-19 dalam timpuh dua bulan ba ujung bulan Oktober pengudah 80 peratus rayat nerima dua dos tuchuk vaksin.
Menteri Pengerai Khairy Jamaluddin madahka, dalam timpuh dua bulan ti deka datai, mensia mayuh patut nelebaka diri enggau virus nya dalam pengawa besesari.
“Enti dipeda, Labuan enggau Sarawak udah ba fasa endemik.
“Kitai patut besedia nelebaka diri enggau virus tu,” ku iya madah maya ba aum media pengerembai senentang Covid-19 di Putrajaya, kemari.
Kelimpah ari nya, iya madah taja pan pengawa nagang pengekai igi penyakit Covid-19 dipeda mujur tang mensia mayuh patut besedia Covid-19 deka nyadi endemik.
Nangkanka nya, pemisi program betuchuk vaksin nyadi chara dikena ngubah chara mensia mayuh (behavioural change) ngagai chara ti ngemeratka standard atur pengawa (SOP) ti ulih mantu kitai tama ngagai renggat baru nelebaka diri enggau virus nya.
Titihka TVS ba Telegram, Facebook, Twitter, Instagram, TikTok enggau YouTube.
