KUCHING: Sarawak ngerikodka lapan kluster baru enggau majoriti ari kes penyakit COVID-19 ia nya kluster ba palan endur gawa sereta kluster komuniti.
Komiti Mutarka Penusah Ngenyit Nengeri (JPBN) Sarawak dalam penerang sida madahka lapan kluster nyadi ba palan endur gawa lalu tiga kluster komuniti ngaul rumah panjai.
JPBN madah, entara kluster baru di Sarawak ia nya Kluster Sepom, Serian, Kluster Maxbi Libai, Subis, Kluster Kampung Dangak, Kuching, Kluster Jalan Usaha Jaya Dua, Kuching, Kluster Industri Jalan Semeba, Kuching, Kluster Kampung Panggil, Kluster Jalan Bintulu-Bakun, Bintulu enggau Kluster Galaxy, Bintulu.
“Kluster Maxbi Libai, Subis ngaul rumah panjai ba baruh Atur Nagang Pemindah Diteritka Agi (PKPD) ti ditemu bisi 93 iku positif COVID-19.
“Bisi 55 iku positif ba Kluster Kampung Panggil ti mungkur empat buah rumah panjai di Kampung Panggil enggau Kampung Nyelam, Sri Aman,” ku JPBN.
Semua sida udah dipasukka ba Sepital Sri Aman enggau PKRC di Dewan Sri Aman.
JPBN mega ngeripotka dua kluster ti udah punas ia nya Kluster Benteng Sri Aman, Sri Aman enggau Kluster Kampung Semban, Kuching pengudah nadai kes dalam timpuh 28 hari.
Nangkanka nya, Sarawak sehari tu ngerikodka 2,992 kes positif COVID-19 ti nyadika penyampau semua kes positif di Sarawak nambah ngagai 121,964 iku.
Kelimpah ari nya, JPBN ngenukuka bisi tujuh kes pemati diripotka kena Hari Empat.
