JULAU: Siku lelaki orang tuai umur diripotka lenyau lebuh ngiga buah rian ba seberai rumah panjai sida di Rumah Lidom, Sungai Enseluai, Nanga Nasi, kemari.
Tuai Balai Bomba enggau Penyelamat Bintangor Nicholas Belulin madahka, tudah Sulau Bilong 78 taun dipelabaka ke kebun iya ngena perau urung pukul 4.15 lemai.
Tudah ditemu enda pulai ke rumah taja pan ari udah malam ngujungka sida sebilik irau ati lalu betelefon ngagai raban bomba.
“Sepengudah nerima kangau urung pukul 11.00 malam, raban bomba lalu ngesah ngagai endur penusah nya nyadi.”
Nitihka ripot anak tudah ke lenyau bisi nguji ngiga sepengudah iya ti nadai pulai, tang lalu nadai tetemu.
Bala rumah panjai mega mantu ngiga tudah tang semina perau aja dipeda ti bisi repik kayu.
“Tudah dipelabaka labuh ke sungai laban bisi repik kayu ba perau pengudah perau nya ditemu orang ari rumah panjai nya,” ku Nicholas madah.
Ku Nicholas nambah agi, bala anak iya mega udah ngaga ripot polis bekaul enggau tudah ke lenyau.
Berindik enggau nya, pengawa ngiga enggau nyelamat (SAR) tudah ba hari keterubah udah berengkah dipejalaika urung pukul 10 pagi, Hari Dua.
Titihka TVS ba Telegram, Facebook,Twitter, Instagram, TikTok enggau YouTube.
