BINTULU: Mensia mayuh mantaika sebana senentang servis Opis Perengka Pengangkut Jalai (JPJ) di Bintulu.
Sida nyau bebaris tumu berengkah ari pukul 5 pagi dikena napatka endur ngaduka pengawa ba opis JPJ nya ke diatu ditatak.
Berebak ari nya, pekara tu nerima perati ari Kaban Parlimen Bintulu Datuk Seri Tiong King Sing.
Nitihka ripot ari UKAS, Tiong merambu ngagai Menteri Perengka Pengangkut Malaysia ngaga opis baru dikena mutarka penanggul nya.
Iya mansutka jaku nya ba aum media ti diatur ba sebuah hotel di Bintulu kilah ensanus.
“Kami merambu deka ngaga opis baru JPJ lalu pekara tu deka dianjung ngagai Menteri Perengka Pengangkut Malaysia seraya ngemanahka tikas opis JPJ Bintulu.
“Opis baru JPJ nya lebih kurang tiga ringkat ke alai ba ringkat baruh dijadika kaunter servis enggau ringkat 2 semina ungkup opis pengatur aja,” ku iya madah.
Tiong madahka, iya enggai meda mensia mayuh bebaris tumu pukul 5 pagi ketegal deka ngaduka pengawa ba JPJ.
Kelimpah ari nya, iya mega minta JPJ nirika langkau penganti dikena mensia mayuh ngenduh ari ujan tauka panas, serata nganti gintir masuk ke opis JPJ, lebih agi orang ke tuai umur bisi datai kia.
Naka ke diatu, JPJ Bintulu semina nyendiaka servis ti ditatak ngagai 170 iku sepiak pagi enggau 40 iku sepiak lemai hari ti nyerangkung semina nguna chara bayar mata duit, kad kredit enggau debit kad.
Ba pengerembai ke sama, Tiong merambu ngagai JPJ ngemendarka mensia mayuh ngemaruka chukai jalai ba Pos Opis.
Titihka TVS ba Telegram, Facebook, Twitter, Instagram, TikTok enggau YouTube.
