BEKAL ubat ti dikena ngubat COVID-19 di sepital perintah ba serata menua tu enda putus tang diterima nengah chara berenggat ari pemekal berindik ari peminta ke tinggi.
Tuai Direktor Pengerai Tan Sri Dr Noor Hisham Abdullah madahka, Opis Menteri Pengerai (KKM) udah bejalaika mayuh bengkah pengawa dikena mutarka penanggul nya nengah sekeda chara ke patut.
Iya madahka, kenyau ari bulan Mei ke udah peminta bekal ubat ke diguna ngubat COVID-19 majak nambah berindik ari peniki kes ke ngenyit ukai semina ba Malaysia tang di serata dunya.
Dr Noor Hisham nerangka, peminta ba dalam menua tu majak nambah entara 10 nyentuk ke 15 kali ganda ti dibanding sebedau pengekai igi penyakit COVID-19 ti nguna matuh bekal ubat COVID-19 ba sepital perintah.
“KKM mega dipadahka bekal ubat bisi kurang mimit ari serikat pengeluar ubat ba menua luar ketegal gaya kemaya hari pandemik tu,” ku iya madah ba dalam siti penerang maya hari Minggu.
Taja pan pia, KKM udah bejalaika sekeda chara baka bekerejasama enggau pemekal ngambika ulih terus diberatka nerima bekal ti nyengkaum ngiga alternatif ubat ba baruh kunterik palan.
Titihka TVS ba Telegram, Facebook, Twitter, Instagram, TikTok enggau YouTube.
