Profesor Dr David Perera
KUCHING: Varian Delta diatu dikelala nyadi varian dominan ti ngeruga pengerai rayat di nengeri tu.
Direktor Institut Pengerai enggau Perubat Komuniti (IHCM) Universiti Malaysia Sarawak, Prof. Dr David Perera madahka pekara nya dalam ripot pemadu baru iya ngagai Chairman Komiti Mutarka Penusah Ngenyit Nengeri (JPBN) Sarawak Datuk Amar Douglas Uggah Embas saritu.
Naka ke diatu, IHCM benung nyidi mayuh bengkah varian SAR COV-2 ti ngekai ba nengeri tu ungkup komiti nya.
Beduduk ari nya, Dr David madah, nyentuk ngagai 17 Ogos ti udah, institut nya udah bejalaika pansik genom ti ngaul 220 kes positif.
Bisi penambah 179 Varian of Concern (VOC) enggau Varian of Interest (VOI) udah ditemu ari penyampau nya.
“Ari VIC /VOI tu, 178 iya nya varian Delta (B.1.617.2) enggau siti kes VOI Indonesia (B.1.466.2) ti diterangka apin lama ti udah.
“Kes tunggal tu disidi ba Bintulu. Penyampau taka Varian Delta ti disidi iya nya 82 peratus ti dipeda dalam ripot tu mandangka penambah enti dibandingka enggau 73 peratus ti diripot maya 17 Ogos,” ku iya nerangka pekara nya.
Dr David madah, nyau deka semua kes ba Pelilih Kuching ngaul varian Delta ti ngayanka taka disidi 99 peratus (68 ari 69 kes).
“Varian Delta disidi tinggi ba Pelilih Samarahan, ia nya 93 peratus (38 ari 41 kes ), enggau Pelilih Serian. ia nya 95 peratus (16 ari 17 kes),” ku iya madah agi.
Kelimpah ari nya, penambah kes Varian Delta mega dipeda ba Pelilih Bintulu, ia nya 84 peratus (20 ari 24 kes), Miri 65 peratus (9 ari 14) enggau Sibu 60 peratus (16 ari 27) .
Varian ti sama disidi ba Pelilih Mukah, ia nya ba taka 78 peratus (7 ari 9 kes).
Ku Dr David madah, Varian Delta mega dirikodka ba Pelilih Sarikei (siti kes) enggau Betong (dua kes).
“Naka ke diatu, bisi 771 VOC/VOI udah disidi ba Sarawak ari lebih 2,000 kes positif ti dirikodka maya 17 Ogos suba,” ku iya madah agi.
