SERIAN: Dagang nyual undang karang ai sungai dipeda bisi potensi rembus ngagai makit entarabansa, ketebal agi laban undang nya diatu nerima peminta ti tinggi ari menua luar.
Lebuh iya nemuai ngagai palan projek nupi undang karang ai sungai Tian Yen Enterprise maya Hari Minggu, Sapit Kepala Menteri Datuk Amar Douglas Uggah Embas madah, projek perintis ti dipejalaika serikat nya udah mujur mansutka undang karang ti sedia dijual enggau pemerat 600 gram siku.
Beduduk ari nya, Uggah ke mega Menteri Betanam Betupi Moden, Tanah Adat enggau Pemansang Kandang Menua ngarapka udah tu mayuh agi pedagang nguji nelebaka diri ba pengawa dagang enggau nupi sereta nyual undang karang ai sungai ba nengeri tu ti tau meri penguntung besai.
“Kitai ngarapka mayuh agi orang betanam betupi bisi pengerindu bejalaika projek baka tu. Sida ulih belajar tauka betanya ngagai serikat tu,” ku iya madah.
Tuai Pegawai Pemansang Pengawa Dagang Tian Yen Enterprise Tom Pooh Siang Sung madahka serikat sida merambu deka ngemesaika agi makit nyentuk ngagai menua Singapura, Jepun, China enggau Kemboja.
Taja pan pia, iya madahka pengawa mansutka undang karang tu nguna timpuh entara lima ngagai enam bulan sebedau ia ulih dijual enggau jelan pemesai.
Berindik ari nya, proses ngemesaika makit deka dipejalaika enggau chara berenggat.
Tang, ba renggat menua tu, Tian Yen Enterprise nagit deka mansutka undang karang ba pun bulan Disember taun tu.
Titihka TVS ba Telegram, Facebook, Twitter, Instagram, TikTok enggau YouTube.
