SERIAN: Komiti Mutarka Penusah Ngenyit Nengeri (JPBN) Sarawak deka ngiga chara ti engkeman dikena mantu pekebun nyual buah rian sida nggai pasar, lebih agi ba kandang endur ti benung kena Atur Nagang Pemindah Diteritka Agi (PKPD).
Chairman JPBNS ke mega Sapit Kepala Menteri Datuk Amar Douglas Uggah Embas madahka iya deka berunding enggau Opis Pengerai Bagi Menua ngiga chara ti patut dikena mutarka pekara nya.
Uggah mansutka jaku nya sepengudah iya nemuai ngagai Top Fruits Sendirian Berhad ti diatu nyadi Palan Ngumpul, Nginjin enggau Mungkus (CPPC) ba Tarat maya Hari Minggu.
“Kitai mesti ngiga chara ti engkeman dikena mantu pekebun ke tekeruga. Rian nya buah ti mudah jai lalu mesti digumpul jampat. Taja pan ukai musim buah, Top Fruits deka terus meli buah enti sema bisi buah deka dijual,” ku Uggah madah.
Berebak ari nya, Uggah ke mega Menteri Betanam Betupi Moden, Tanah Adat enggau Pemansang Kandang Menua meri penerang senentang Top Fruits ti endang sebuah kompeni besai ti mansutka produk ti nguna buah rian sereta pes durian ti dieksport ngagai menua luar.
Serikat nya ngemunka pengawa ba taun 2018 lalu udah mujur nganjung export ti keterubah enggau penyampau 16 tan metrik ngagai menua China.
Iya madah, serikat nya ba taun 2019 udah meli kira-kira 670 metrik tan rian ari pekebun ba Bau, Serian, Padawan sereta Siburan ti nguna beungkus RM1.14 juta.
Titihka TVS ba Telegram, Facebook, Twitter, Instagram, TikTok enggau YouTube.
