KUCHING: Sekretari Besai Gabungan Parti Sarawak (GPS), Datuk Seri Alexander Nanta Linggi, nyambut manah penyiri Datuk Seri Ismail Sabri Yaakob nyadi Menteri Besai Malaysia kesemilan.
Iya nyemetak madahka, semua tuai parti enggau rayat mesti ngetuka penyarut politik di menua tu seraya mekuhka pengawa ngelaban sereta nagang pengekai igi penyakit COVID-19.
“Berindik ari penyiri Datuk Seri Ismail Sabri Yaakob nyadi Menteri Besai ke-9, aku ngarapka tu ulih ngetuka penyarut politik ti udah nyadi ngelama beberapa bulan ti udah. Sepengudah kabinet baru ditumbuh, aku ngarapka sida nerima sukung ari semua rayat ba menua tu,” ku Nanta madah lebuh dirandau pengarang berita nengah telefon maya Hari Lima.
Beduduk ari nya, Nanta arap Ismail Sabri deka neruska pengawa ngelaban pengekai igi penyakit COVID-19 sereta nentuka program betuchuk vaksin nyapai tagit seraya mantu mulaika pemanah ekonomi menua.
“Aku ngarapka genap iku rayat di Malaysia nyukung Ismail Sabri nyadi Menteri Besai menua tu,” ku iya madah agi.
Nangkanka nya, Nanta lebuh bekunsika peneleba iya gawa ba Opis Menteri Menua Pesisir ti dituaika Ismail Sabri ari taun 2015 nyentuk ngagai taun 2018 madahka Ismail Sabri endang seruran meratika peminta guna Sarawak.
Nanta pechaya pemansang di nengeri tu deka terus dikemeratka Menteri Besai Malaysia kesemilan nya udah tu ila.
“Peneleba aku sepemanjai ngelala iya, ba penemu aku Datuk Seri Ismail Sabri Yaakob tu siku tuai ke patut dijadika chunto, ukai semina ketegal ulah profesional iya aja, tang mega pemereti ati iya senentang peminta guna rayat ke mendam di menua pesisir baka di Sarawak. Aku arap iya meretika peminta nengeri bukai ti begunaka pemansang tebal agi nengeri ti ngembuan mayuh rayat baka Sarawak,” ku Nanta madah agi.
Ambika chunto, sebedau tu iya udah ngemendarka mayuh duit turu dikena bejalaika sekeda projek ngemanahka tikas jalai alun, genturung pendiau, sereta nyendiaka bekal karan enggau perengkaguna bukai.
TVS bisi ba Telegram, Facebook, Twitter, Instagram, TikTok enggau YouTube.
