KUCHING: Tiap iku Kaban Parlimen dipinta ngetu betalatka penemu sereta nejuka bida runding politik, lalu meri sukung ngagai Datuk Seri Ismail Sabri Yaakob ke udah dichiri nyadi Menteri Besai Malaysia kesemilan, seraya neruska pengawa ngelaban pengekai igi penyakit COVID-19 di menua tu.
Nya pekara ti dipadahka Sapit Kepala Menteri Tan Sri Dr James Jemut Masing.
Masing, ke mega Presiden Parti Rakyat Sarawak (PRS), madahka Ismail Sabri engka ukai orang ke dipilih sekeda sida nyadi Menteri Besai menua tu, tang iya dipilih 114 iku Kaban Parlimen ari penyampau kesemua 220 iku Kaban Parlimen.
“Kitai meri peluang ngagai iya dalam timpuh 20 bulan tu nyadi tuai perintah kitai, lebih agi ngelaban pengekai igi penyakit COVID-19.
“Enti sema COVID-19 tu udah dipunaska, kitai ulih bejalaika pengidup baka sebedau tu. Beduduk ari nya, enti ulih kitai deka milih Menteri Besai ke ulih mai pengelantang nengah proses demokrasi,” ku iya madah nengah siti penerang maya Hari Lima.
Kelimpah ari nya, Masing madahka Ismail Sabri dipilih ngena chara ti sah ari Kaban Parlimen lalu rikod sebedau tu mandangka iya siku menteri ke ransing gawa sereta komited lebuh bejalaika pengawa.
Iya madahka, Ismail Sabri chukup taluk ngagai parti, ke alai iya dichalunka bediri maya Pengawa Bepilih Besai Ke-14 (PRU-14).
“Aku ngarika PRS meri pengaga ati ngagai Datuk Seri Ismail Sabri Yaakob laban udah mujur dichiri nyadi Menteri Besai Malaysia kesemilan. Iya deka nanggung pengawa ti berat udah tu ila, lebih agi ngelaban pengekai igi penyakit COVID-19 ti agi benung nuntung menua,” ku Masing agi.
TVS bisi ba Telegram, Facebook, Twitter, Instagram, TikTok enggau YouTube.
