Malaysia Nerima 200,000 Dos Vaksin CanSino

KUCHING, 20 Ogos; Malaysia deka nerima vaksin siti dos iya nya vaksin CanSino penyampau 200,000 dos ari pemekal CanSino Biologics, China sehari tu.
Tuai Direktor Pengerai, Tan Sri Dr Noor Hisham Abdullah ba laman media madahka vaksin nya deka datai dalam produk ke udah tembu.
“Sepenyampau 3.5 juta bekal dos vaksin CanSino lalu pengawa nganjung vaksin deka dipejalai bererenggat. Tu vaksin Covid-19 siti dos ti keterubah di Malaysia,”ku iya.
Vaksin CanSino udah datai ba Palan Penerebai Bilun Antarabangsa Kuala Lumpur (KLIA) urung pukul 7:50 pagi ngena bilun MAS kargo MH361 ari Beijing, China udah disambut Ketuai Sekretari Sains, Teknologi enggau Inovasyen (MOSTI), Datuk Dr Siti Hamisah Tapsir Ketuai Sekretari Opis Menteri Pengerai (Kkm), Datuk Mohd Shafiq Abdullah enggau Sapit Ketuai Sekretari (Pemansang Teknologi) MOSTI.
Naka ke diatu, vaksin ke diguna dalam program betuchuk vaksin Covid-19 ti udah dipejalaika ba bulan dua nyin tadi mungkur vaksin Pfizer-Biontech, Sinovac enggau Astrazeneca lalu ke diatu siti agi vaksin iya nya Johnson & Johnson udah bulih pemendar bepenetap .