KAKUS, 13 Ogos – Sekeda ari Komiti Pemansang enggau Pengelikun Genturung Pendiau (JKKK) Rumah Panjai di sitak DUN Kakus nerima chek Projek Mit Menua Pesisir (MRP) maya hari empat.
Chek MRP nya diserahka Kaban Kunsil Nengeri Kakus Datuk John Sikie Tayai ke diatu pengawa nya benung chakah dipejalaika.
Beduduk ari nya, sekeda ari tuai rumah ke nerima chek MRP nya meri timbal ke manah seraya madahka sida endang nguna duit turu nya ngemanahka tikas rumah panjai.
Tuai Rumah Lipu Ngalih ari Sungai Bawang Selangau madahka, duit turu MRP ke diberi nya deka dikena ngangkat manah tikas pemansang ba rumah panjai sida ti meri pengelantang ngagai komuniti ba genturung pendiau nya.
“Meri terima kasih ngagai YB kitai laban iya ke udah bebendar ngaduka kandang menua Arip, Bawang dan Sungai Tau ke udah meri bantu. Bisi orang ke bedau nya ukai enda bulih tang sigi dudi. Laban kami ditu amat nyukung perintah ke megai kami,” ku iya madah lebuh dirandau pengarang berita sepengudah nerima chek MRP maya hari Empat.
Lipu madahka MRP ke diberi ngagai JKKK rumah panjai iya sigi deka diguna manah-manah ungkup pemansang ke tau nambahka pengelantang peranak ke dipegai iya.
Nangkan ke nya, Tuai Rumah Dicka Anthony ari Sungai Anak Selangau madahka, taja pan MRP ke diberi enda mayuh, tang bantu nya ulih diguna sida ngentak rumah panjai baru udah tu ila.
“Laban duit ke diberi tu deka dikena aku ngaduka rayat aku di rumah panjai lebih agi kami deka ngentak rumah panjai ba taun baru, Sebedau tu iya kala meri kami MRP dikena ngerataka taba rumah panjai kami,” ku iya madah.
Nangkan ke nya, John Sikie ke mega Menteri Muda Undang-Undang enggau Adat Bumiputera madahka, ungkup JKKK ke udah nerima MRP sebedau tu deka diberi ba taun baru ila.
“Diberi aku ngagai bala kitai ba sitak DUN Kakus. Nyadi sida ke bedau tang udah kala nerima sebedau tu taun siti nyin kemari minta ampun aku taun tu kira bedau mih kita nya. Nganti taun baru ila nerima.” ku iya madah lebuh ba Program Nyerahka Chek MRP maya hari Empat.
Iya mega madahka rumah panjai diberi nguna chara begintir tetiap taun ngambika semua nerima bantu ke lebih mayuh seraya ngelancharka agi projek pemansang enggau ngemanahka tikas rumah panjai.
Titihka TVS ba Telegram, Facebook, Twitter, Instagram, TikTok enggau YouTube.
